ជប៉ុន គឺជាប្រទេសនៃគោលដៅទេសចរដ៏សំខាន់មួយសម្រាប់ភ្ញៀវទេសចរមកពីទូទាំងពិភពលោកដែលចង់ទៅទស្សនាកម្សាន្ដ។ ហើយប្រសិនជាអ្នកទៅលេងនៅជប៉ុនក្នុងកំឡុង ខែកុម្ភៈ មិនា និងមេសា (ក្នុងរដូវកាលចូលឆ្នាំខ្មែរ) នេះគឺជាពេលវេលាល្អបំផុតសម្រាប់លោកអ្នក ព្រោះវាជារដូវកាលដែលមានការរីកស្គុះស្គាយនៃផ្កាសាគូរ៉ាយ៉ាងស្រស់ស្អាត។
1. ប្រាសាទអូសាកា
ប្រាសាទអូសាកា ត្រូវបានសាងសង់ឡើងកាលពីឆ្នាំ ១៥៨៣ ដែលជាកន្លែងកម្សាន្ដដ៏ទាក់ទាញមួយក្នុងប្រទេសជប៉ុន។ ភ្ញៀវទេសចរណ៏អាចទៅដល់ទីនោះតាមរយៈស្ថានីយរថភ្លើង Osakajokoen។ នៅប្រាសាទនេះ មានសម្បូរបែបទៅដោយរទេះលក់អាហារ សួនច្បារ និងការទស្សនារបាំផ្សេងៗ ជាពិសេសនៅរដូវផ្កាសាគូរ៉ារីក វាពិតជាបង្កើតឲ្យមានភាពស្រស់ស្អាតកាន់តែស្អាតបំផុត។
2. ព្រៃឬស្សី
ព្រៃឫស្សី មានទីតាំងស្ថិតនៅជាយទីក្រុង Kyoto នៃប្រទេសជប៉ុនដោយគ្រាន់តែចំណាយពេលធ្វើដំណើរប្រមាណ ៣០នាទីប៉ុណ្ណោះដើម្បីទៅដល់ព្រៃឬស្សីមួយនេះ។ ភាគច្រើននៃភ្ញៀវទេសចរដែលបានទៅកម្សាន្ដនៅទីនោះ គឺដើម្បីថតរូបនៃព្រៃឫស្សីដ៏ស្រស់ស្អាតមួយនេះ និងស្តាប់សំឡេងធម្មជាតិពីក្នុងព្រៃដ៏គួរឲ្យទាក់ទាញ ជាមួយខ្យល់អាកាសដ៏ត្រជាក់ស្រស់ស្រាយ។
3. ប៉ម Sky Tree ក្នុងទីក្រុងតូក្យូ
ប៉ម Sky Tree គឺជាប៉មដ៏ល្បីស្ថិតនៅក្នុងទីក្រុងតូក្យូដែលមានកម្ពស់ ៦៣៤ម៉ែត្រ ទៅលើអាកាស ហើយនៅជាន់ផ្ទាល់ដីនៃប៉មនេះ មានផ្សារទំនិញ ភោជនីយដ្ឋាន សារមន្ទីរ និងអាងហែលទឹក។ សម្រាប់ភ្ញៀវទេសចរអាចឡើងទៅលេងនៅលើប៉មនេះធ្វើការថតរូប ដើម្បីផ្ដិតយកទស្សនីយភាពដ៏ស្រស់ស្អាតនៃទីក្រុងតូក្យូទាំងមូល។
4. ចម្ការស្រ្តប៊េរី
ចម្ការស្ត្រប៊េរី Yamamoto ស្ថិតក្នុងតំបន់ Tohoku មានទំហំជាង ៣ហិកតាដែលភ្ញៀវទេសចរអាចទៅកម្សាន្ដបាន និងភ្លក់រសជាតិនៃស្ត្រប៊េរីជប៉ុន។ លើសពីនេះទៀត ក៏មានហាងកាហ្វេ ហាងស្រា និងហាងនំប៉័ងផងដែរ ហើយភ្ញៀវគ្រាន់តែចំណាយពេលធ្វើដំណើរពីស្ថានីយរថភ្លើង Yamashita រយៈពេល ៣នាទីប៉ុណ្ណោះដើម្បីទៅដល់ទីនោះ។
5. ភ្នំហ្វូជី
ភ្នំហ្វូជី គឺជាភ្នំដ៏ខ្ពស់បំផុតក្នុងប្រទេសជប៉ុនដែលមានកម្ពស់ ៣,៧៧៦ម៉ែត្ រហើយជាភ្នំខ្ពស់បំផុតទី ៧នៅលើពិភពលោក។ ដើម្បីទៅដល់ទីនោះភ្ញៀវទេសចរអាចជិះរថភ្លើងល្បឿនលឿនដ៏ទំនើបបំផុតដែលអាចធ្វើដំណើរក្នុងល្បឿនចាប់ពី ២៤០-៣២០គីឡូម៉ែត្ រក្នុងមួយម៉ោង។ លើសពីនេះទៀត ភ្ញៀវទេសចរក៏អាចទៅកម្សាន្ត នៅរម្មណីដ្ឋានទឹកពុះធម្មជាតិ Onsen ដ៏ល្បីល្បាញ ក៏ដូចជាទស្សនារូបសំណាក់ពងមាន់ខ្មៅនៅក្នុងទីក្រុង Hakone ។
6. តំបន់អូដាយបា
អូដាយបា គឺជាកោះសិប្បនិមិត្តដ៏ធំបំផុតនៅឆ្នេរនៃទីក្រុងតូក្យូដោយធ្វើដំណើរកាត់តាមស្ពានឥន្ទធនូដ៏ស្រស់ស្អាត។ នៅលើកោះនេះ ភ្ញៀវទេសចរអាចរីករាយជាមួយកន្លែងកម្សាន្ដដ៏សម្បូរបែបដូចជា សារមន្ទីរ អគារតាំងពិពណ៌សិល្បៈ ស្ពានឥន្ទធនូ ផ្សារទំនើប ទទួលទានសាច់អាំងនៅសួនច្បារ និងមជ្ឈមណ្ឌលបច្ចេកវិទ្យានិងវិទ្យាសាស្ត្រជាដើម។ ជាពិសេសនៅលើកោះនេះ ក៏មានរូបសំណាក់សេរីភាពដ៏ទាក់ទាញដែលភ្ញៀវទេសចរចូលចិត្តទៅកម្សាន្ដ។
7. ស្ពានឥន្ទធនូ
ស្ថិតនៅក្នុងទីក្រុងតូក្យូប្រទេសជប៉ុន ស្ពានឥន្ទធនូនេះត្រូវបានសាងសង់ឡើង ដើម្បីតភ្ជាប់ទៅកាន់តំបន់អូដាយបាដែលជាទីទាក់ទាញភ្ញៀវទេសចរ។ ស្ពាននេះមានប្រវែង ៧៩៨ម៉ែត្រ និងទទឹង ៤៩ម៉ែត្រដែលមានផ្លូវល្បឿនលឿន ខ្សែរថភ្លើងឆ្លងកាត់ និងផ្លូវអ្នកថ្មើរជើងផងដែរ។ ភ្ញៀវទេសចរអាចទស្សនាភាពស្រស់ស្អាតនៃទីក្រុង និងឆ្នេរតូក្យូផងដែរ។
8. សួនកំសាន្តឌីសនីលែន
សួនកំសាន្តឌីសនីលែន (Disney Land) ជាសួនកំសាន្តដ៏ល្បីឈ្មោះ ដែលលោកអ្នកអាចរីករាយជាមួយពិភពសុបិន្ត ពិភពអនាគតកាល ពិភពផ្សងព្រេង ទីក្រុងគំនូរជីវចល ដែលមានល្បែងកំសាន្តរន្ធត់អារម្មណ៏ និងការសំដែងដ៏អស្ចារ្យជាច្រើនដូចជា៖ ចោរសមុទ្រករីបៀនផ្ទះខ្មោច ដំណើរផ្សងព្រេងរបស់ព្រះនាងព្រិលស ភាពយន្ត4D ជិះអាប៉ូឡូ និង Space Mountain។
9. ទីក្រុងណាហ្គូយ៉ា
ណាហ្គូយ៉ា គឺជាទីក្រុងធំជាងគេទី៤នៅប្រទេសជប៉ុនហើយស្ថិតនៅក្នុងតំបន់អាឈីដែលមានមន្តស្នេហ៏នៃប្រទេសជប៉ុន។ ទីក្រុងមួយនេះ ត្រូវគេបានទទួលស្គាលថាជាមជ្ឈមណ្ឌលនៃឧស្សាហ៏កម្មរថយន្តនៅជប៉ុន ហើយលោកអ្នកក៏អាចស្វែងរករោងចក្រដែលល្បីឈ្មោះនៅទីនោះផងដែរដូចជា៖ Toyota, Honda, Mitsubishi...។
10. ទីក្រុងសាប៉ូរ៉ូនៃកោះហុកកៃដូ
សាប៉ូរ៉ូ ជាសួនកម្សាន្ត មួយនៅកោះហុកកៃដូនៃប្រទេសជប៉ុន ដែលមានរូបចម្លាក់ព្រិលដ៏ធំៗ ដែលបំភ្លឺជារៀងរាល់ថ្ងៃនៅពេលរសៀល ហើយនៅក្នុងឆ្នាំ ២០២០ នេះផងដែលក៏មានកម្មវិធីមហោស្រពព្រិលសាប៉ូរ៉ូ (The Sapporo Snow Festival) ដែលបានធ្វើឡើងចាប់តាំងតែពីថ្ងៃទី៣១ ខែមករា ដល់ថ្ងៃទី១១ ខែកុម្ភៈ ឆ្នាំ២០២០ នេះផងដែរ។